Арсовска по пресудата: „Командант Барути“ цинично се смееше и не покажа ни трошка каење

Градоначалничката на Град Скопје, Данела Арсовска, ја поздрави вчерашната судска одлука со која Сулејман Љамалари беше осуден на двегодишна затворска казна за нападот врз неа, оценувајќи ја како „системска победа за жртвите на насилство“. Во својата реакција, таа упати и остри критики кон напаѓачот, но и кон министерот за внатрешни работи, Панче Тошковски.

„Ова е победа за секоја жена и мајка, но и за одбрана на институцијата градоначалник“, напиша Арсовска, додавајќи дека напаѓачот не покажал ни трошка каење и континуирано се исмевал со судот и јавноста.

„Дури се обиде жртвата да ја претстави како напаѓач, а себеси, иако е насилник, да се претстави дека бил тепан од жена“, истакна градоначалничката.

Според неа, Љамалари, познат како „командант Барути“, до последен момент бил уверен дека ќе избегне казна. Арсовска го посочи како најбизарен моментот кога неговата адвокатка во завршните зборови, како што вели, се обидела да изврши притисок врз судот, користејќи изјава од министерот Тошковски дека „напаѓачот бил жртва“.

„Запаметете ја оваа мудра министерска мисла: ‘НАПАЃАЧОТ БИЛ ЖРТВА’. Затоа има фемициди, затоа жените кои се жртви на насилство не можат да се изборат со системот, бидејќи системот ги брани напаѓачите“, напиша Арсовска во својата објава.

Основниот кривичен суд во Скопје вчера го прогласи Сулејман Љамалари за виновен за грубо насилство извршено на 11 јули, кога Арсовска беше на терен поради дивоградби во општина Чаир. Во казната ќе се засмета и времето поминато во куќен и затворски притвор. Љамалари, кој за време на судењето призна дека ја навредувал, но не и дека ја удрил, останува во притвор до правосилноста на пресудата, на која има право на жалба.