Арсовска: Градот функционира
Град Скопје сè почесто е цел на критики од страна на граѓаните, кои алармираат дека улиците се валкани, контејнерите преполни, а отпадот не се собира редовно. Сликите од преполни контејнери стануваат секојдневие, а социјалните мрежи често се преплавени со коментари за нехигиената во главниот град.
Сепак, градоначалничката Данела Арсовска не гледа проблем во начинот на функционирање на јавните комунални служби. Таа тврди дека ситуацијата е иста како и во минатите години и дека ЈП „Комунална хигиена“ секојдневно излегува на терен, според утврден распоред.
„Градот Скопје функционира, односно комуналното претпријатие, Јавното претпријатие, Комунална хигиена, работи идентично, поденаково како што работело и во сите изминати години… Значи, секојдневно во оние денови од неделата, кога за истото, нормално, треба да излезат на теран и да го завршат истото“, изјави Арсовска.
Таа укажа на тоа дека некои приватни субјекти, наместо да го носат отпадот на депонијата „Дрисла“, го оставаат покрај или во јавните контејнери, што создава дополнителен хаос.
„Се случува да имаме ситуацији каде што комунално претпријатие или пак приватни субјекти кои што ги собираат овие отпади од доманкинствата, односно од правни лица, истите не ги исфрлаат во Дрисла, како единствената санитарна депонија во Македонија. А сега, бидејќи имаме навистина ригорозни санкции, успеваме да ги детектираме сите оние депонии, каде што се обидуваат да ги депонираат и таму следат кривични одговорности, тие во часовите, наоѓаат кога има некој измеѓу период, истото го вршат како празнење во контејнерите, односно, поконкретно покрај контејнерите“, додаде таа.
Градоначалничката нагласи дека Комуналната инспекција на Град Скопје има двојно повеќе инспекциски надзори и казни од сите други инспекции во земјата. Според неа, проблемот лежи и во недоволната ангажираност на општините и нивните комунални служби.
Иако улиците, според неа, редовно се метат, Арсовска признава дека тие многу брзо повторно се валкаат. На прашање да ја оцени хигиената во Скопје од 1 до 10, таа одби да даде конкретна бројка.
Дали граѓаните ќе ја прифатат оваа слика како реална, останува прашање. Но едно е јасно – Скопје сè повеќе изгледа како град кој се бори со сопствениот отпад.
