Армијата ја зајакна својата борбена готовност со приемот на 29 нови лесни оклопни возила JLTV
Со новата испорака, вкупниот број на лесни оклопни возила JLTV во Армијата се искачи на 67 од планираните 96. Министерот Мисајловски најави дека наскоро се очекува и пристигнување на оклопните возила „Страјкер“, исто така од американско производство, со што значително се зголемуваат одбранбените капацитети и интероперабилноста со НАТО сојузниците.
На свечената презентација на новите борбени возила присуствуваше највисокиот државен и воен врв, вклучувајќи го премиерот Христијан Мицкоски, министерот за одбрана Владо Мисајловски и началникот на Генералштабот, генерал-мајор Сашко Лафчиски. Присуството на амбасадорката на САД, Анџела Агелер, го потврди стратешкото партнерство меѓу двете земји во областа на одбраната.
Премиерот Мицкоски истакна дека вложувањето во Армијата е влог во траен мир и заштита на татковината. Тој ја нагласи важноста на модернизацијата и посочи дека Владата, во соработка со САД, има потпишано седум нови договори за набавка на опрема за специјални сили, беспилотни летала и опрема за сајбер заштита.
Мицкоски ја поврза модернизацијата на Армијата со стратешката важност на Коридорите 8 и 10, кои, според него, претставуваат клучна логистика за јужното крило на НАТО. Амбасадорката Агелер истакна дека новите возила се олицетворение на постојаната американска поддршка за одбранбените способности на Северна Македонија.
