Архиепископот Стефан со Божиќно послание: Повик за мир, љубов и единство
Архиепископот охридски и македонски †Стефан, заедно со Светиот архијерејски синод на Македонската православна црква – Охридска архиепископија, упати традиционално Божиќно послание до верниците, повикувајќи на духовно единство, љубов и мир.
Во посланието, Архиепископот Стефан истакна дека раѓањето на Господ Исус Христос е настан кој го преобразува целиот свет и нуди можност за духовно воздигнување и победа над гревот и смртта. Тој потсети дека секој човек има непроценлива вредност пред Бога, кој ја докажа својата љубов кон човештвото преку жртвата на Христос.
„Денес го празнуваме Рождеството на Синот Божји. Но, од секого од нас зависи дали Тој ќе се роди и во нас, дали ќе се всели во нашите срца и души,“ нагласи Архиепископот, повикувајќи верниците да ја следат „ѕвездата на совеста,“ која води до вистинско покајание и преобразба.
Посланието ги повикува верниците да се откажат од зависта и љубомората, следејќи го примерот на пастирите и мудреците кои со радост го прифатиле доаѓањето на Спасителот. Напротив, зависта, како кај царот Ирод, води кон духовна пропаст.
Архиепископот ја потенцираше важноста на заедничкото служење со дарбите кои секој ги примил од Бога. „Какви и да се нашите таланти, нивната вистинска смисла ја добиваат кога се принесуваат на Бога,“ порача тој, повикувајќи на заемно почитување и изградба на заедништво во Црквата.
На крајот од посланието, Архиепископот и членовите на Светиот архијерејски синод упатија порака за мир, љубов и радост: „Со овие пораки ви го честитаме празникот на Христовото рождество на сите чеда на Македонската православна црква – Охридска архиепископија, како во Татковината, така и насекаде по светот. Христос се роди!“
Честит Божиќ и благословена Нова година!
