АПСЕЊА ВО СРБИЈА: Група подготвувала насилно уривање на власта
Шест лица се уапсени под сомнение за подготовка на дела против уставниот поредок и безбедноста на Србија.
Тие се уапсени на неколку локации низ Србија под сомнение за сторено кривично дело подготовка на дела против уставниот поредок и безбедноста на Србија – соопшти Министерството за внатрешни работи. Додаде дека се извршени претреси на неколку локации на територијата на Србија и дека, во соработка со надлежните органи, полицијата продолжува да работи на овој случај.
Припадници на Министерството за внатрешни работи, Управата за криминалистичка полиција, Службата за сузбивање на криминалот, Службата за антитероризам и полициските одделенија во Ужице, Чачак и Крагуевац, во соработка со Агенцијата за безбедност и информации, а по наредба на Вишото јавно обвинителство во Белград, уапсија шест лица на неколку локации на територијата на Србија, поради постоење основи на сомнение дека сториле кривично дело подготовка на дело против уставниот поредок и безбедноста на Србија, во врска со кривичното дело повикување на насилна промена на уставниот поредок – соопшти Министерството за внатрешни работи.
Уапсените се И.М. (1977), Н.А. (1978), В.К. (1970), А.И. (1976), С.Г. (1973) и Б.М. (1968).
„Се сомнева дека на 21 јуни се сретнале во хотел во Краљево со цел да испланираат насилна промена на власта во Република Србија и се договориле за напади врз претставници на државни институции, физички напади врз полицајци со цел нивно разоружување, насилни упади во зградата на Владата на Република Србија и други институции, како и во медиумите Радио Телевизија на Србија, „Хепи“ и „Информер“, сите со најава дека ќе употребат огнено оружје“, се наведува во соопштението.
Против И.М. ќе биде поднесена кривична пријава поради постоење основи на сомнение дека сторил кривично дело нелегално производство, поседување, носење и трговија со огнено оружје и експлозивни направи.
„Полицијата во автомобилот „Шкода“, со кој осомничениот И.М. се движел по патот кон Пожега, пронашла пиштол, со полиран сериски број, со рамка во која имало седум куршуми и фабричка кутија со 25 парчиња муниција, кои нелегално ги поседувал, без дозвола од надлежните органи“, соопшти полицијата.
Се додава дека кај уапсениот В.К. е пронајден самострел.
На осомничените им е одреден притвор до 48 часа, по што ќе бидат однесени во надлежното обвинителство со кривични пријави.
Во тек се претреси на неколку локации на територијата на Република Србија и, во соработка со надлежните органи, полицијата продолжува да работи на овој случај.
