Ангеловски: Вечерва одигравме подобро отколку против Вардар
Одамна е јасно дека битолскиот тим нема шанси за пласман во плејофот од елитното натпреварување, но борбата е за поправка на впечатокот.
„Имавме можност да се увериме во квалитетот на секој ракометар на ПСЖ. Кога веќе губиме, сакав поразот да биде што е можно помал, можеби можеше негативата уште пониска. Натпреварот го загубивме во првото полувреме во кое Грин имаше десет одбрани. Потоа на сцена стапи и Паличка кој само продолжи и со такви голмани на противниците, тешко е некој да се надева на добар резултат.
Сигурен сум дека одигравме подобро, отколку против Вардар, но квалитетот на ПСЖ е далеку поголем. Она што можам да го поздравам во нашиот тим е што имаме долга клупа и што кој и да излезе на теренот, максимално е фокусиран“, рече Ангеловски на прес-конференцијата по натпреварот.
Со неговата констатација се согласува и Марио Танкоски кој го заврши натпреварот со еден постигнат гол.
„Лошо влеговме во мечот, со 1-5 и моравме постојано да бркаме резултат. Проблемот е тоа што против екипа како ПСЖ, тоа оди малку потешко. Тројца од ракометарите на овој тим неодамна станаа европски шампион, имаше уште неколку со сребрени и бронзени медали. Скапо не чинеа и промашените пенали, веројатно ако ги погодевме ќе се изборевме за попристоен пораз, но конечниот резултат, сепак, е реален исход“, рече Танкоски.
