Ангеловски повеќе не е привремен тренер на Пелистер

Од 24 октомври 2023 година, тој беше „привремено решение“, како замена на тренерскиот двоец Шундовски-Јовиќ. Во вториот дел од сезоната, поранешниот репрезентативец ќе го води тимот како шеф на стручниот штаб.

„РК Пелистер ја известува јавноста дека од денес улогата на тренер во нашиот тим целосно му е доверена на Бранислав Ангеловски, така што повеќе нема да ја извршува улогата на привремен, туку на перманентен предводник на екипата. Тој се обврза на договор до крајот на сезоната и утре од 16:00 часот ќе одржи прозивка за вториот дел од сезоната“, стои, меѓу другото, во соопштението од Пелистер.

Пред да биде назначен за привремен тренер, Ангеловски беше и спортски директор на битолскиот клуб, а првакот го водеше на четири натпревари во Лигата на шампионите на кои не успеа да оствари победа.