Ангелов: Состојбата со пожарот во ловиштето „Јасен“ попладнево се влоши поради силниот ветер
Состојбата со пожарот во ловиштето „Јасен“ попладнево се влоши поради силниот ветер кој значително ја зголеми брзината на огнената стихија. Пламените јазици зафатија борови стебла, создадоа висока температура и густ црн чад кој се движеше кон гребенот, информира директорот на Дирекцијата за заштита и спасување, Стојанче Ангелов.
„Нашата главна задача беше да спречиме пожарот да премине кон село Брезница и кон скопската страна. Со големи напори, заедно со вработените и пожарникарите од Македонски Брод, успеавме да го задржиме огнот на гребенот“, изјави Ангелов, нагласувајќи дека густата чадна завеса го отежнувала дишењето, но екипите не се повлекле.
Помош на терен пристигнува и од пожарникари од Скопје, Велес и Куманово, како и од општина Сопиште која обезбедува дотур на вода. На терен се и припадници на ЕБР со специјални возила „пинцгауер“, за полесно движење по непристапниот терен.
Центарот за управување со кризи соопшти дека до 18 часот биле регистрирани 20 пожари на отворен простор низ земјата – седум сè уште активни, еден под контрола, а 12 изгаснати.
Покрај „Јасен“, активни пожари има и во општина Студеничани (села Горно Количани и Драчевица – Китка), во струшкото село Подгорци, кај прилепското Беловодица – Ливада и Лењиште (Долнени), кај селата Стровија и Долгаец, во општина Росоман – село Дебреште, како и во кичевско – село Душегубица.
Под контрола е ставен пожарот кај селото Канарево, општина Старо Нагоричане, кој зафати ниска вегетација.
