Јаневска: Голем дел од проблемите во студентскиот дом во Тетово се веќе решени
Министерката за образование, Весна Јаневска, денеска зборуваше за состојбата во студентскиот дом во Тетово, потенцирајќи дека голем дел од наследените проблеми се веќе решени. Според ревизорскиот извештај, околу деведесет проценти од проблемите кои можеле веднаш да се отстранат, се решени, додека за останатите е потребно повеќе време. Јаневска посочи дека, како што е наведено во извештајот и од страна на инженерите, во кујната на домот нема соодветна вентилација, што претставува сериозен градежен проблем. До негово решавање, храната ќе се обезбедува преку економски оператор, согласно закон.
Министерката нагласи дека паралелно се работи и на решавање на другите проблеми, како што се стипендиите за студенти од Шангајската листа кои студираат на врвни универзитети. Таа објасни дека претходно немало база на податоци за студентите, што сега е создадена, а договорите биле изменети за да бидат реални и изводливи – студентите сега треба да ја вратат само сумата што ја добиле и да бидат на располагање на државата пет години по завршување на студиите.
Дел од студентите формирале група „Мостови“ и соработуваат со институции како Заводот за статистика и Министерството, додека другите се следени преку шестмесечни извештаи, бидејќи нивните договори не биле безусловни.
Јаневска, исто така, зборуваше и за базата на професори кои се ангажирани и предаваат надвор од универзитетите, вклучително и во странство. Таа најави дека кога базата ќе биде доволно комплетна, информациите ќе бидат јавно објавени, со цел да се зголеми транспарентноста и довербата на граѓаните во институциите.
На новинарско прашање за малолетничкото насилство во Чаир, министерката нагласи дека иако насилството не се случувало во училишта, сите треба да работат на намалување на ваквите случаи. Таа посочи дека наставниците и училиштата се важни, но и родителите имаат клучна улога во воспитувањето на децата.
Во однос на барањата за зголемување на студентскиот оброк, Јаневска рече дека е со право и дека ќе се разгледа можноста за следната година, зависно од буџетските можности. Таа додаде дека ќе продолжи да ги застапува правата на студентите и досега сите нивни барања од Министерството биле исполнети.
