Андоновски по разделбата со Американките: Ми беше чест и вечно ќе сум благодаен!
Андоновски ја презема американската селекција по СП 2019 кога Американките четврти пат станаа светски шампионки, четири години ја подмладуваше селекцијата, но не успеа да ги исполни високите очекувања на годинешниот Мундијал, па на крај спогодбено се раздели со американската федерација, која денеска ја потврди разделбата.
„Ми беше голема чест што тренирав многу талентирани фудбалери, кои напорно работеа во женската селекција во изминативе четири години. Многу сум оптимист за програмата за иднината, особено што младите фудбалерки ја добија шансата во последниве години и во иднина ќе ја носат оваа селекција. Иако сите сме разочарани од настапот на Мундијалот, јас сум горд колкав напредок има оваа селекција, за поддршката која си ја даваат една на друга и за инспирацијата кон другите фудбалерки што ја даваат. Секогаш ќе ѝ бидам благодарен на американската федерација за укажаната шанса да бидам селектор на оваа неверојатна селекција“, рече Андоновски.
Твила Килгоре е привремено решение како наследничка на Андоновски, а Американците му се заблагодарија на Македонецот за сиот придонес.
„Мора да искажеме огромна благодарност кон Влатко за својата комплетна посветеност кон женската репрезентација. Знаеме дека тој ќе продолжи да дава голем придонес за националниот тим, иако не е повеќе селектор и му посакуваме сѐ најдобро во иднина“, рече Синти Парлоу Коне, претседателката на американскиот фудбал.
