Андоновски: Централниот регистар нуди над 100 услуги и е прва адреса за секој што сака да започне бизнис во Македонија
На денешната прослава по повод 24-годишнината од своето постоење, Централниот регистар истакна дека е една од првите институции која се приклучи кон платформата за интероперабилност, овозможувајќи размена на податоци помеѓу институциите на стандарден, безбеден и унифициран начин. Ова значи услуги без хартија, без чекање и без непотребна администрација.
Министерот за дигитална трансформација, Стефан Андоновски, истакна дека Централниот регистар месечно остварува над 100.000 трансакции преку оваа платформа, што ја потврдува нејзината важност како еден од клучните столбови на дигитализацијата во државата.
„Централниот регистар е институција која 24 години е мотор на македонската економија. Министерството за дигитална трансформација го гледа како еден од главните партнери во нашата визија за модерна, транспарентна и дигитална држава,“ рече Андоновски.
Тој нагласи дека, во изминатите две децении, Централниот регистар се издигнал како симбол на ефикасна администрација, управувајќи со десетици регистри и нудејќи над 100 услуги, а е и првата адреса за сите кои сакаат да започнат бизнис во Македонија.
Андоновски истакна дека за да се создаде просперитетна држава каде дигитализацијата го подобрува животот на граѓаните, ја зајакнува борбата против корупцијата, привлекува странски инвестиции и овозможува иновации, потребно е да се вложува во модерни и дигитализирани институции.
„Непречениот проток на информации меѓу институциите ја подобрува ефикасноста и овозможува услуги кои се прилагодени на потребите на граѓаните и компаниите,“ додаде министерот.
Во последните 12 месеци, Централниот регистар разви каталог на услуги за корисниците и ја интегрираше електронската идентификација преку профилот на uslugi.gov.mk, приближувајќи ја Македонија кон европскиот модел за електронски услуги.
„Сите граѓани, без разлика каде се наоѓаат, со еден профил можат да пристапат до услугите на Централниот регистар и на други институции, без да паметат десетина лозинки,“ нагласи Андоновски.
Тој најави дека Министерството за дигитална трансформација заедно со Централниот регистар ќе продолжи да работи на целосна дигитализација на услугите, поголема интеграција со европските системи и создавање услови за брзи, сигурни и транспарентни услуги за младите претприемачи и инвеститори.
