Американскиот претседател ќе стави вето на нацрт-законот за помош на Израел доколку тој не ја вклучи Украина
Американскиот претседател Џо Бајден ќе стави вето на нацрт-законот за помош на Израел, доколку Конгресот го одобри во сегашната форма без да ја спомене Украина, пренесоа светските агенции, повикувајќи се на канцеларијата за буџет на Белата куќа.
Во октомври Белата куќа побара од Конгресот дополнителни средства за обезбедување помош на Украина и Израел, како и за спротивставување на Кина во азиско-пацифичкиот регион и за подобрување на безбедноста долж границата со Мексико. Администрацијата на Џо Бајден за овие цели побарала средства од редот од 106 милијарди долари.
Во понеделникот, републиканците во Претставничкиот дом воведоа предлог-закон кој нема поддршка за Украина и предлага финансирањето на помошта за Израел да доаѓа од кратењата на Службата за внатрешни приходи. Белата куќа го отфрли тој предлог.
И покрај барањето на администрацијата, нацрт-законот не предвидува никаква помош за Украина, истакна Канцеларијата за буџет на Белата куќа, истакнувајќи дека ако Украина не биде поддржана, тоа ќе испрати многу лош сигнал до Русија и остатокот од светот за решителноста на Вашингтон .
Белата куќа посочи дека републиканците ја политизираат поддршката на САД и „покажуваат поинаков пристап кон сојузниците“ На Израел му е понудена помош од 14,3 милијарди долари.
„Овој предлог-закон е лош за Израел, за Блискиот Исток и за нашата национална безбедност“, се вели во соопштението на канцеларијата на Белата куќа, додавајќи дека претседателот Џо Бајден ќе стави вето на законот доколку му биде претставен овој вид.
Републиканците имаат мнозинство од 221-212 во Претставничкиот дом, а демократите го контролираат Сенатот со 51-49. За да може овој проект да стане закон, тој мора да помине во двата дома на Конгресот и да биде потпишан од претседателот Бајден, забележува Ројтерс.
