Американската војска соопшти дека кинески борбен авион дошол на три метри од американски бомбардер Б-52 над Јужното Кинеско Море

Кинески борбен авион дошол на три метри од американски бомбардер Б-52 над Јужното Кинеско Море, што за малку ќе предизвикало несреќа, објави Асошиејтед прес, повикувајќи се на американската војска. Изјавата на војската ја нагласува реалната можност за несреќа во услови на борба на двете земји за влијание во регионот, наведува агенцијата.

За време на ноќното пресретнување, кинески борбен авион со два мотори Шенјанг Жаи-11 се приближи до авион на американското воено воздухопловство со „неконтролирана брзина, поминувајќи под, пред и на три метри од бомбардерот Б-52, што претставува ризик од судир на двата авиони“, соопшти американската Индо-пацифичка команда. „Загрижени сме што овој пилот не знаеше колку блиску е до несреќа“, соопшти американската војска.

Кинеското Министерство за надворешни работи сè уште не одговорило на барањето на АП за коментар. Агенцијата потсетува дека во сличен инцидент во мај, кинеската влада ги отфрли американските приговори и побара од Вашингтон да престане да врши такви летови над Јужното Кинеско Море.

Кина станува се понаметлива во тврдењето на своите претензии кон поголемиот дел од Јужното Кинеско Море како нејзини територијални води. САД и другите земји кои го користат огромниот океански простор за превоз не ја прифаќаат оваа позиција.

Тврдењата на Кина доведоа до долготрајни територијални спорови со другите земји кои се граничат со Јужното Кинеско Море, една од главните светски трговски патишта. Минатата недела, брод на кинеската крајбрежна стража и еден од бродовите на кинеската поморска милиција се судрија со брод на филипинската крајбрежна стража и брод за воени набавки, соодветно, кај спорниот атол.

САД и нивните сојузници редовно спроведуваат воени вежби во Јужното Кинеско Море, а авиони редовно летаат над областа, со порака дека воздухот и водата таму се меѓународни, посочува АП.

Американскиот бомбардер Б-52 вршел „рутинска законска операција во меѓународниот воздушен простор над Јужното Кинеско Море“ кога во вторникот бил пресретнат од кинески борбен авион „Шенјанг жаи-11“, соопшти американската војска. Пресретнувањата се вообичаени, со повеќе од 180 пресретнувања пријавени од есента 2021 година, според американската страна, иако не е вообичаено авионите да поминуваат едни со други на толку кратко растојание. АП смета дека растечката тензија меѓу Пекинг и Вашингтон ќе ескалира во случај на судир на авиони од двете земји.

Американската војска соопшти дека инцидентот нема да го промени нејзиниот пристап во регионот. „САД ќе продолжат да летаат, пловат и да оперираат – безбедно и одговорно – до степен до кој дозволува меѓународното право“, се вели во соопштението.