Алта банка ги купи конфискуваните акции на Мијалков!
Државата, преку Агенцијата за управување со одземен имот, успешно ги продаде конфискуваните акции на поранешниот шеф на тајната полиција, Сашо Мијалков, во поранешната Стопанска банка Битола, објави „Фактор“.
Според официјалните податоци од Македонска берза, купувач е белградската „Алта банка“, која со оваа трансакција се стекна со дополнителни 7.213 обични акции.
Станува збор за акции кои беа конфискувани во случајот „Империја“, а за чија продажба Владата минатиот месец даде согласност уште еднаш да бидат понудени на јавна аукција.
Со оваа последна аквизиција, српската банка го зголеми својот сопственички удел во битолската банка на вкупно 95,13 отсто од вкупниот број акции.
Почетната цена на аукцијата, која се одвиваше од 5 до 13 јануари, изнесуваше 3.194 денари по акција, со што државата целосно го отуѓи запленетиот пакет хартии од вредност што претходно беа во сопственост на поранешниот директор на УБК.
