Алиу: Вештачката интелигенција има голем потенцијал за унапредување на здравството
Примената на вештачката интелигенција (ВИ) во здравството има огромен потенцијал за унапредување на здравствената заштита, но клуч за успехот останува управувањето со здравствениот кадар, кој е најзначајниот ресурс во системот.
Ова го истакна министерот за информатичко општество и администрација, Азир Алиу, на денешното отворање на Симпозиумот на лекарските комори од Централна и Источна Европа, што се одржува во Скопје во организација на Лекарската комора на Република Северна Македонија.
„Примената на вештачката интелигенција во здравството има навистина голем потенцијал за унапредување на здравствената заштита. Не помалку важна е и темата за планирање и управување со здравствениот кадар, бидејќи тој е најзначајниот ресурс во здравството,“ рече министерот Алиу во своето обраќање.
Тој изрази уверување дека собирот, на кој учествуваат претставници на лекарски комори од повеќе земји, ќе придонесе за изнаоѓање решенија за подобри услови за работа на лекарите, а со тоа и поквалитетно лекување за пациентите.
