Албанија годинава со 53 отсто повеќе посети од странци
Официјалната статистика потврдува дека оваа летна сезона бележи значително зголемување на бројот на посетители, во однос на минатата година во Албанија.
Институтот за статистика го објави извештајот за сместувачките структури во текот на месец јули, според кој, бројот на посетители е зголемен за 35,9 отсто во однос на истиот период лани. Според податоците на ИНСТАТ, бројот на резидентни посетители е зголемен за 8,9 проценти, а на нерезидентните посетители за 53,1 проценти.
Според Институтот за статистика, во текот на месец јули, исполнетоста на соби „хотели и слично сместување“ изнесува 49,3 отсто, наспроти 44,8 проценти во јули 2023 година.
Она што се издвојува во текот на оваа летна сезона е должината на одморите. Бројот на ноќевања е зголемен за 16,1 отсто во однос на 2023 година. Странските туристи престојуваа подолго, главно во крајбрежните области.
Значителен пораст е и бројот на нерезидентни посетители од Косово. Во однос на лани бележат пораст од 14,3 проценти. Голем број посетители во текот на месец јули имаше од Италија, Полска, Германија и Македонија.
