АЛБАНИЈА Е ЛИДЕР ВО СВЕТОТ ПО ЗГОЛЕМУВАЊЕ НА БРОЈОТ НА ТУРИСТИТЕ: Рама вели дека ова било незамисливо пред неколку години
Албанија е прва во светот по зголемување на бројот на туристи.
Светскиот туристички барометар покажува дека класичните дестинации за летен одмор како Шпанија, Грција и Турција привлекуваат најмногу туристи. Ако го гледаме највисокиот процентуален раст на туристи во последните пет години, преовладуваат други дестинации, а Албанија е на прво место.
Информацијата преку социјалните мрежи ја сподели премиерот Еди Рама, објавувајќи ја табелата и најавувајќи понатамошно зголемување на бројот на туристите.
„Албанија го зазема првото место во светот како дестинација со најголем пораст на бројот на туристи во 2024 година, развој незамислив пред неколку години. По рекордната година за туризам, кога Албанија ја посетија над 10,7 милиони туристи, целта за 2025 година е уште поамбициозна, 12 милиони посетители“, пишува Рама.
Албанија доживеа значителен раст на туризмот во последните години. Според бројките, земјата пречекала 7,5 милиони туристи во 2022 година, а во 2023 година тој број бележи зголемување за околу 30 отсто, односно 10,1 милиони.
