АКО ЗАСТАРИ ДЕЛОТО, СРАМНО Е ЗА ДРЖАВАТА“: Повторно одложено судењето за Јилдиз Веапоска, таа се закани со секојдневни протести
Судскиот процес за осакатувањето на родилката од Дебар, Јилдиз Веапоска, која по породувањето остана без матка, јајник и бубрег, денеска во Основниот суд во Струга беше повторно одложен.
Причина за одложувањето е отсуството на адвокатот на обвинетите, кој во судницата доставил доказ дека бил на друго судење во Битола. Ова е само уште едно во низата одложувања на процесот кој предизвикува огромно внимание во јавноста, а најмногу револт кај оштетената.
Судскиот процес, во кој првообвинетиот Мухамед Асани (лекар-специјалист гинеколог), второобвинетиот Блертон Асани (лекар-специјализант) и третообвинетата Лилјана Јованоска (лекар-гинеколог), се товарат за тешки дела против здравјето на луѓето, започна во 2022 година. Делото застарува во 2026 година, а досега се соочи со бројни одлагања, враќања од почеток и менување на судии и обвинители.
Судијата Јордан Јованов појасни дека во конкретниот случај морал да го прифати оправдувањето, бидејќи одбраната приложила доказ дека бранителот е повикан на „притворски предмет“ во Битола, што се смета за приоритет.
Сепак, свесен за ризикот од застарување, судијата Јованов најави дека нема да дозволи тоа да се случи и донел одлука секое следно рочиште да го закажува ден за ден.
„Загрижувачки во овој случај е тоа што постојано во барањето за одлагање на одбраната се потенцира дека другите предмети се приоритетни… и се заборава дека и овој предмет исто така е итен оти има опасност од застареност“, изјави судијата Јованов. Тој најави дека секој кој следен пат нема да го оправда изостанокот, ќе биде присилно донесен во судницата.
Оштетената Јилдиз Веапоска, видно револтирана, изјави дека ова се последните очајнички обиди пред застарување на делото.
„Денеска по вторпат е одложено рочиштето поради адвокатот на обвинетиот… Сакам гласно да кажам и да ги повикам и адвокатот и судиите: дали не е приоритет мојот предмет што веќе пет години сум во овие судски врати и пет години психички се малтретирам и целиот настан, сè повторно ми се враќа во моите мисли?“, изјави таа.
Веапоска најави дека доколку нема одлука до крајот на месецов и се продолжи со одлагање, таа ќе започне со секојдневен протест пред судот, од 8 до 16 часот.
Таа истакна дека очекува правда, особено по супервештачењето на Судска медицина, кое, според неа, ќе ја докаже вината кај лекарите кои ја оставија без три органи.
„Ако застари делото, срамно е за цела наша држава. Барам само правда, ништо друго“, рече таа [cite].
Нејзиниот адвокат, Сашо Јанев, смета дека ваквиот начин на одбрана со постојани одлагања само покажува дека обвинетите се виновни за делото.
„Ваквиот начин на одбраната… само покажува дека обвинетиот е навистина виновен… и нивниот единствен излез е застареноста на делото. Верувам во Судот дека нема да го дозволи тоа… и ве уверувам дека таа пресуда ќе биде осудителна“, изјави Јанев.
