АКО НЕ ПОЧНЕМЕ ДА СЕ МЕНУВАМЕ НА КРАЈ ЌЕ ИСЧЕЗНЕМЕ Славјанка Петровска предложила политички ветинг и за членовите на раководството на СДСМ
Ако не почнеме да се менуваме, како партија ќе бидеме маргинализирани, а во крајна линија – ќе исчезнеме, порача пратеничката Славјанка Петровска по завршувањето на 31 Конгрес на СДСМ на социјалните мрежи.
Таа информираше дека на Конгресот се отвориле тешки но неопходни прашања за иднината на партијата.
„Не беше лесно да се зборува по два тешки изборни пораза. Не е лесно, но е обврска на секој социјалдемократ. Последниот изборен пораз е катастрофален, а воедно е и резултат на: отсуството на дискусии за изборните порази во 2024 и во 2021, како и недоволната анализа на резултатот од 2020 година. Не смееме повторно да ја направиме истата грешка“, напиша Петровска.
Таа соопшти дека предложила статутарна измена со која претседателите на општинските организации ќе се избираат непосредно од членството, а не како досега да ги назначува претседателот на партијата. Таа смета дека со тоа се враќа моќта на одлучување кај членовите.
„Порачав дека критичката мисла е суштинска одлика на социјалдемократијата. Но, за да ја расчистиме секоја дилема: кој критикува и од кои побуди предложив политички ветинг за сите сегашни и поранешни носители на функции и за членовите на раководството со цел да не ни се повторуваат непристојни јавни објави ‘едни против други’“, додаде Петровска.
Таа е уверена дека со добра стратегија и јасно дејствување секој проблем станува предизвик, а секој предизвик – победа.
.
