Ако финансиската полиција не испита, ние ќе отвориме предмет за украсувањето на Скопје, најавуваат од Обвинителство
На поставено новинарско прашање, „Како е можно градоначалничката Данела Арсовска со Јавен повик да троши 30.000 евра пари на Градот за новогодишно украсување кога за сума над 1.000 евра мора да се објави оглас според Законот за јавни набавки?“, од Јавното обвинителство ја повикаа финансиската полиција да го истражи случајот.
„Со оглед на изнесеите наводи во конкретниот случај, Управата за финансиска полиција како орган надлежен за откривање на евентуални кривични дела и контрола на финансиските текови има надлежност да ги испита сите околности и да достави соодветно известување или пријава“, велат од Јавното обвинителство.
Тие додаваат дека доколку во разумен рок Финансиската полиција не ги истражи наводите, предмет ќе фомира и надлежното Јавно обвинителство.
„Доколку Финансиската полиција не постапи, обвинителството ќе оформи предмет и ќе нареди да се извршат сите проверки“, додаваат од ОЈО.
Инаку градоначалничката на Град Скопје, по низата критики дека Скопје остана не украсен, најави дека од 15-ти ќе светне Скопје за 30 илјади евра, без да каже кој ќе се погрижи за новогодишното украсување на градот.
