Јакимовски: Како се најдов на црна листа на САД кога на 4 јули бев поканет на прием во Амбасадата, ми кажаа дека не канат криминалци!
Градоначалникот на Карпош, Стевчо Јакимовски вчера во изјава за медиумите порача дека зад одлуката да биде ставен на црната листа на американскиот Стејт департмент не стои цела американска политика, туку „само некои нејзини делови“.
Тој најави дека нема намера да се откаже од канидатурата за претседател на државата.
„Од изборната кампања ни случајно нема да се откажам. Ова е само доказ дека моите политики се исправни и дополнителен мотив да продолжам понатаму“, рече Јакимовски, кој додаде дека е изненаден од одлуката.
Јакимовски најави и кривична пријава против непознат сторител за мешање во внатрешни работи.
„Како да не бидам изненаден кога на 4 јули бев поканет од Американската амбасада и стриктно ми беше кажано дека листата е максимално редуцирана и се одеше строго по листа за на Денот на американската државност да не бидат присутни некои што тие не ги сакаат – криминалци или други несакани лица. Ова е мешање на странски разузнавачки служби во изборот на претседател на државата. Јавно кажувам дека ќе поднесам кривична пријава против н.н. сторител. Мора да се утврди кој од овде ја направи оваа нечесна работа“, рече Јакимовски и додаде дека тој е „единствениот кандидат што не е поддржан од Сорос, а граѓаните треба да одлучат дали Сорос ќе ни бира претседател на државата“, вели Јакимовски.
