АКЦИИТЕ НА DUOLINGO СКОКНАА ЗА 7 ОТСТО ПРЕД ЕВЕНТУАЛНАТА ЗАБРАНА НА TIKTOK ВO САД: Сè повеќе луѓе сакаат да учат мандарински

Цената на
акцијата на Duolingo се зголеми за речиси седум проценти во четвртокот, бидејќи
зголемениот број корисници на апликацијата се обидуваат да научат мандарински.

Цената на акциите на компанијата скокна за 21,82 долари
(21,20 евра) или 6,82 отсто од претходното затворање од 341,80 долари (332
евра), по наглото зголемување на бројот на корисници кои се регистрираа за
учење мандарински јазик, што се совпаѓа со зголемената популарност на кинеската
социјална мрежа RedNote, конкурент на TikTok кој е пред затворање на
американскиот пазар.

Компанијата потврди за CNBC дека бројот на корисници кои
учат мандарински преку апликацијата е зголемен за 216 отсто во споредба со
претходната година. За споредба, шпанскиот, еден од најпопуларните јазици на
апликацијата, забележа пораст од 40 проценти во истиот период, според Duolingo.

RedNote, или Xiaohongshu како што е познато во Кина, брзо
стана најсимнуваната бесплатна апликација во продавницата на Apple и ја задржа
таа позиција во поголемиот дел од оваа недела. Во првите пет се и апликацијата
Lemon8 на TikTok, американската социјална мрежа Clapper, ChatGPT на OpenAI и Threads.

Минатата недела, Врховниот суд на САД ја сослуша понудата на
TikTok да остане на американскиот пазар. И покрај ова, судиите изгледаа
посклони да го поддржат законот со кој би се забранила популарната апликација,
и тие би можеле да донесат одлука за тоа уште денеска. Според извештаите, TikTok се подготвува да се затвори
во САД во недела.

Според податоците на аналитичката компанија Sensor Tower,
RedNote досега беше најголемиот корисник на егзодусот на американските
корисници од TikTok, забележувајќи дури 20 пати повеќе преземања во САД во
текот на изминатата недела.

Портпаролот на Duolingo изјави за CNBC дека маркетинг тимот
на компанијата е „стратешки фокусиран на иднината и веќе е активно присутен на
RedNote“, за што се грижи тимот на експерти на Duolingo во Кина.

Duolingo нуди онлајн и мобилни курсеви за 42 јазици. Според
податоците од нивната веб-страница, платформата има 48,8 милиони корисници кои
учат шпански. Францускиот е втор најпопуларен јазик со 27,3 милиони корисници,
додека кинескиот е на осмото место со 10,7 милиони корисници.

Минатата година акциите на Duolingo пораснаа за 43 отсто,
надминувајќи ја добивката на Nasdaq од 29 отсто.