Ахмети најави „Национален договор за напредок“ и целосен ветинг со меѓународен надзор
Претседателот на Демократската унија за интеграција, Али Ахмети, на конгресот на партијата што се одржа во Скопје најави иницијатива за нов „Национален договор за напредок“ и побара целосен ветинг со меѓународен надзор за сите носители на јавни функции во изминатите 34 години.
Ахмети предложи воведување „извршен Бадентер“ при изборот на Владата, примена на Бадентеровиот принцип во работата на Уставниот суд, како и отворање нова фаза на функционална и фискална децентрализација.
Според него, овие иницијативи имаат за цел зајакнување на унитарниот карактер на државата преку еднакво партнерство на сите заедници, враќање на довербата во институциите и обезбедување стабилна, функционална и праведна држава.
– Унитарната држава може да биде функционална и стабилна само ако се темели на довербата и лојалноста на сите заедници што живеат во неа – изјави Ахмети, нагласувајќи дека единството е предуслов за напредок.
Тој претстави три клучни мерки насочени кон правична застапеност, функционална еднаквост и општествена кохезија, во согласност со духот на Охридскиот рамковен договор.
Избор на Влада со „извршен Бадентер“
Првата мерка предвидува избор на Владата со двојно мнозинство, односно доверба од вкупното мнозинство пратеници, но и од мнозинството пратеници кои ги претставуваат немнозинските заедници. Според Ахмети, ваквиот модел ќе обезбеди двоен легитимитет и вистинска застапеност на сите заедници во извршната власт.
Бадентеров принцип и во Уставниот суд
Втората мерка се однесува на примената на Бадентеровиот принцип во Уставниот суд. Ахмети оцени дека законите усвоени со двојно мнозинство во Собранието не треба да бидат укинувани без двојно мнозинство и во рамките на Судот, предлагајќи уставно-правни измени за одлуките што ги засегаат правата на немнозинските заедници.
Продлабочување на децентрализацијата
Како трета мерка, Ахмети ја посочи потребата од зајакнување на локалната самоуправа преку поголема финансиска автономија на општините, со правична распределба и враќање на даночните и таксените приходи во средините каде што тие се создаваат.
Во делот за владеењето на правото, тој ја поддржа идејата за темелна истрага за потеклото на имотот, процесот на приватизација и дејствијата на безбедносните служби од 1945 година до денес, нагласувајќи дека правдата мора да биде неселективна.
Ахмети истакна дека „Националниот договор за напредок“ треба да ги обедини сите заедници и експерти околу заедничка визија за државата, повикувајќи млади, жени, професионалци и дијаспората активно да се вклучат во процесот на градење европска иднина.
На конгресот, ДУИ усвои четири резолуции поврзани со зајакнување на унитарниот карактер и функционалната еднаквост, владеењето на правото и независното судство, националниот договор за напредок и одржлив развој, како и европската интеграција.
