Ахмети бара граѓаните да го поддржат Османи за претседател, целта е да се запре влијанието на Русија!
Првиот човек на ДУИ Али Ахмети денеска преку свое обраќање на социјалните мрежи посочи дека Бујар Османи ќе биде кандидат на неговата партија на претседателските избори.
Со слоганот „Не за Русија, да за Европа“, Ахмети ги повика граѓаните да го поддржат Бујар Османи за претседател на РСМ, за, како што рече, да се запре влијанието на Русија.
Ахмети рече дека е време да се промени Уставот во однос на изборот на претседател, поточно претседателот да биде избран во Собранието од пратениците.
„Поларната мечка, Русија ни тропа на врата и се меша во сите пори на нашето општество и влијае на партиската сцена во земјата. Русија е присутна во политичките партии, во медиумите, во граѓанското општество и во секој општествен сегмент, не само овде, туку и во регионот. Путин и Лавров изјавија дека членството на РСМ во НАТО е линијата на огнот.
Сведоци сме дека членството во ЕУ не ни е можно и повторно сме изолирани. Македонија е мала земја на раскрсницата на цивилизациите. Затоа, ве повикувам да се собереме и да ја водиме последната битка од вечната војна и заедно да кажеме „не за Русија, да за Европа“, рече Ахмети.
Тој ги повика и пратениците да ги одобрат уставните амандмани за вклучување на бугарската заедница во Уставот на РМВ.
