Агенцијата за конфискација ќе добива 7 отсто од продадениот имот
Дритон Небиу, директорот на Агенцијата за управување со одземен имот го поздрави усвојувањето на Законот за управување со конфискуван имот, имотна корист и одземени предмети во кривична и прекршочна постапка. Тој наедно напомена дека со новото законско решение предвидено е Агенцијата да задржува 7 отсто од вредноста на остварениот приход од секоја продажба на одземените предмети и конфискуваниот имот со цел, како што соопшти,„ефикасен менаџмент“.
„Најголемиот дел од направените измени се во насока на подобрување на постојната правна рамка во која има недоволно јасни постапки во однос на извршувањето на решенијата и пресудите за конфискација на имот и имотна корист, промени на не доволно јасните аспекти поврзани со имот кој е конфискуван од правни субјекти, а над кои е отворена стечајна постапка, конфискација на дивоградбите, прашања поврзани со заложно право над конфискуваниот имот, прашања поврзани со проценката, продажбата на имотот, терминолошко унапредување, унапредување на одредбите за социјално повторно користење (social reuse) на привремено одземениот имот, трајно одземениот имот и конфискуваниот имот, воведување Регистар, a воедно предвидено е Агенцијата да задржува 7 (% ) проценти од вредноста на остварениот приход од секоја продажба на одземените предмети и конфискуваниот имот од страна на Агенцијата, со цел за ефикасен менаџмент“, соопшти Небиу.
Со донесување на Законот, Агенцијата смета дека ќе биде решен огромен државен децениски проблем произлезен од илјадниците стари возила кои се распространети ширум територијата во нашата земја.
