Адем Чучуљ предложен за претседател на ДКСК
Адем Чучуљ, образован правник со завршен правосуден испит, ќе биде предложен од Комисијата за прашања на изборите и именувањата до Собранието за нов претседател на Државната комисија за спречување корупција (ДКСК).
Комисијата за селекција на кандидатите му додели највисоки оценки на Чучуљ, со што тој освои 96,5 бодови. Тој моментално ја врши функцијата генерален секретар на ДКСК, каде што работи веќе 19 години.
Одлуката Комисијата за прашања и избори и именувања едногласно ја усвои и ја препорача на Собранието Чучуљ да биде нов претседател на Антикорупциската комисија. Според информациите од Собранието, пленарната седница на која ќе се гласа за предлогот ќе се одржи на почетокот на декември.
Комисијата за селекција нагласува дека Чучуљ има „значајно искуство во спречување на корупцијата и судирот на интереси, како и јасна визија и конкретен план за работата и развојот на ДКСК“.
Конкурсот за избор на нов претседател беше објавен уште летото, но процесот привремено беше стопиран поради локалните избори. Од 13 кандидати кои аплицираа, 10 беа селектирани, а интервјуата со нив започнаа минатиот вторник.
Новото раководство на ДКСК ќе го замени местото на Татјана Димитровска, која поднесе оставка по обвинението во случајот „Адитив“ за оддавање службена тајна и компјутерски фалсификат. Според обвинението, таа на обвинето лице му пренесувала информации од предмет кој се водел во Антикорупциската комисија, а исто така е обвинета и за фалсификување на сертификат за државна тајна.
