АД МЕПСО нема да дава донации до следната година
АД МЕПСО ги прекинува сите видови на донации и спонзорства до крајот на оваа година. Одлуката беше донесена едногласно, на седница на Управниот одбор на АД МЕПСО, предводен од страна на генералниот директор Бурим Љатифи.
Заеднички заклучок е дека трошоците и издатоците по оваа основа треба да се стопираат до следната 2025 година. Процесот ќе продолжи,но како што велат од националниот оператор за пренос на електрична енергија, на транспарентен начин и со детално почитување на критериумите предвидени за оваа намена.
„На ваков чекор Управниот Одбор се одлучи по анализата на долгата листа на донации и спонзорства и паричните средства кои биле доделени од почетокот на годината па се до доаѓање на новото раководство. Сеопфатниот преглед на нашите служби покажа дека во првите седум месеци од 2024 година претходното раководство на Друштвото, кое наводно делувало согласно Законот за донации и спонзорства во јавни дејности, ја пречекорило финансиската програма за оваа година за речиси 10 милиони денари .
За новиот менаџерски тим единствен приоритет останува вложувањето исклучиво во продуктивни инвестиции кои се во насока на градење и управување на стабилен и доверлив електропреносен систем на најтранспарентен начин и отчетно“, објаснуваат од МЕПСО.
