40% БАРААТ СМЕНА НА КОЦЕВСКИ, 73% СЕ ПРОТИВ ЗГОЛЕМУВАЊЕ НА ПЛАТИТЕ НА СУДИИТЕ Граѓаните незадоволни од правосудниот систем и бараат реформи
Последното истражување на јавното мислење спроведено од МКД.мк преку агенцијата Маркет вижн открива дека македонските граѓани не се задоволни од работата на судиите и јавните обвинители во правосудниот систем.
Најголем дел од испитаниците сметаат дека судиите и јавните обвинители не заслужуваат зголемување на месечните примања, а повеќе од 40 отсто од граѓаните се за смена на државниот јавен обвинител Љупчо Коцевски.
Според анкетата, на прашањето дали судиите и јавните обвинители заслужуваат повисоки плати, дури 73,6 отсто од испитаниците одговориле негативно. Само 14,8 отсто сметаат дека зголемувањето на буџетот за македонското правосудство е оправдано.
Најголем дел од граѓаните сметаат дека ситуацијата во судството нема да се подобри дури и ако судиите и обвинителите добијат повисоки плати.
Во однос на работата на државниот јавен обвинител Љупчо Коцевски, 42,3 отсто од испитаниците дале негативна оценка за неговата работа, додека 22,2 отсто сметаат дека тој добро ја врши својата функција. За смена на Коцевски се изјасниле речиси 40% од граѓаните.
Анкетата беше спроведена од 25 ноември до 6 декември 2025 година, со употреба на CAТI метод – телефонско анкетирање со помош на компјутер, на примерок од 1.200 испитаници. Примерокот е репрезентативен на ниво на целата држава според регион, пол, возраст и етничка припадност, согласно податоците од пописот 2021 година.
.
