371 лице лани биле следени тајно во Македонија
Во 2024 година значително е намален бројот на случаи во кои биле користени посебни истражни мерки – од 87 случаи во 2023 на само 35. Но, бројките покажуваат дека мерките биле далеку поопфатни и поефикасни.
Според најновиот извештај на Јавното обвинителство, со мерките биле опфатени 363 лица со утврден идентитет, 8 лица со неутврден идентитет, како и 163 предмети на кривично дело, што претставува зголемување за 75% кај предметите во однос на лани.
Најчесто користена била мерката за тајно следење и снимање лица и предмети надвор од домот, применета во 26 случаи. Веднаш зад неа е следењето на телефонски и електронски комуникации, користена во 25 случаи. Обете мерки резултирале со отворање истраги против вкупно 83 лица, а 34 од нив се веќе обвинети или осудени.
Посебни истражни мерки се применувале и за симулиран откуп, поткуп, користење прикриени истражители и контролирана испорака – сите со реални резултати: пресуди и спогодби.
Интересен е податокот дека во два случаи иницијативата за следење не дошла од МВР, туку директно од обвинителството, што укажува на засилена улога на обвинителството во борбата против организираниот криминал и корупцијата.
„Овој вид мерки се користи исклучиво кога нема друг начин да се прибават докази. Тие се средство, не цел, и клучен елемент за успешен кривичен прогон,“ се наведува во заклучокот на извештајот.
