24 години од загинувањето на бранителите кај месноста Љуботенски бачила
Денес во Општина Ѓорче Петров се одбележаа 24 години од загинувањето на македонските бранители Томе Димоски, Ивица Златевски, Раде Јанковски, Томислав Настевски, Ацо Ангеловски, Томе Бадаровски, Гоце Чанкуловски, Бранко Јанев и Марјанчо Бошковски. Храбрите војници ги положија своите животи на 10 август 2001 година, во месноста Љуботенски Бачила, бранејќи ја татковината.
Градоначалникот Александар Стојкоски, заедно со претставници на Општината, положи свежо цвеќе на неколку споменици во нивна чест – на споменикот на херојот Томислав Настевски во Ѓорче Петров, на Споменикот на бранителите во реонскиот парк и на Споменикот на македонските јунаци во Волково.
„Тие не се само имиња – тие се нашата колективна совест, нашиот завет и нашиот обврзувачки спомен. Нивната храброст ја искова слободата што денес ја живееме. Нашата должност е да паметиме и да ја пренесуваме нивната жртва на идните генерации,“ порача Стојкоски.
Во својата објава, тој додаде дека жртвата на бранителите е „знаме“ и „обврска“ за сите граѓани, потсетувајќи дека со челична решеност ја бранеа секоја педа од татковината.
Настанот беше одржан со присуство на семејствата на загинатите, претставници на институции и граѓани, кои со едноминутно молчење им оддадоа почит на паднатите херои.
„Вечна им слава и благодарност. Да живее Република Македонија,“ заврши пораката на градоначалникот.
