Сцена од филм. Вака синоќа коментираа пешаците кои во тој момент поминаа на раскрсницата кај „Нова Македонија“. Возилото на Брза помош со вклучени ротациони светла на сред раскрсница, а неколку метри подолу и цивилен автомобил сведочеа за големата сообраќајна несреќа, која за среќа помина без жртви.

КАКО СЕ СЛУЧИ?

Пред полноќ, возило во сопственост на Итната медицинска помош од Куманово, марка „Мерцедес“ со вклучени ротациони светла и неофицијално и сирени возело кон Клиничкиот центар во Скопје. Зад воланот на амбулантното возило седел 23 годишниот В.С кој во тој момент имал предност на минување на раскрсницата.

Од другата страна возило со скопски регистарски означи, марка „фолксваген туран“ управуван од 57-годишниот Ч.Д од засега непознати причини според првичните информации не дал предност на минување на возилото на ИМП со вклучени светлечки и звучни сигнали.

„Во несреќата со тешки телесни повреди се здобил возачот Ч.Д., а со телесни повреди се здобиле возачот на возилото од Итна медицинска помош, сопатничката од истото возило А.К.(40) и лицето кое се превезувало како пациент Ж.Ц.(72) двајцата од Куманово констатирани во Комплексот клиники ‘Мајка Тереза’ и Градската општа болница ‘Св.Наум Охридски’“, велат од МВР.

Извршен бил увид од увидна екипа од СВР Скопје.