21 кандидат за нов македонски судија во Стразбур!
Министерството за надворешни работи денеска информира дека на јавниот повик за избор на кандидати за судија во Европскиот суд за човекови права во Стразбур се пријавиле вкупно 21 лице.
Како што велат во наредниот период Меѓуресорската Комисија формирана со одлука на Владата, ќе ги разгледа пристигнатите апликации.
„Меѓуресорската Комисија формирана со одлука на Владата на Република Северна Македонија, ќе ги разгледа пристигнатите апликации, ќе изврши интервјуирање на кандидатите и ќе пристапи кон процес на нивно рангирање, со цел предлагање на тројца кандидати до Советодавниот панел на експерти за избор на судии при Советот на Европа, согласно член 22 од Европската Конвенција за Човекови права (ЕКЧП)“, информираат од МНР.
Како што додаваат, процесот на селекција ќе се спроведе во согласност со утврдените критериуми и процедури, со цел обезбедување на транспарентност и објективност при изборот на најсоодветните кандидати за оваа значајна позиција.
