18-ти „Марш на ангелите“ во чест на загинатите од трагедијата во „Пулс“
Со силна порака дека „спомените се единствената сила што нè држи исправени“, денеска во Кочани се одржа 18. „Марш на ангелите“, посветен на младите животи што згаснаа во пожарот во дискотеката „Пулс“.
Настанот се одржа токму на денот кога се навршуваат пет месеци од трагедијата што роднините и пријателите ја опишуваат како најтешкиот ден во нивните животи.
„Пет месеци празнина во срцето, пет месеци во кои секој здив е потежок од претходниот. … Спомените се единствената сила што не држи исправени. Мостот меѓу вчера и денес. Љубовта што ја оставија зад себе е вечна и никогаш нема да згасне“, рече Розета Џамова, сестра на загинатиот Јорданчо Џамов, во обраќањето пред присутните.
Маршот започна во 18:05 часот од пред Паркот на револуцијата, а учесниците поминаа покрај судот, обвинителството и трговскиот центар, застанувајќи пред повеќе локации поврзани со нивната борба за правда.
На транспарентите што ги носеа роднините стоеја пораки како:
✦ „Колку животи треба да згаснат за вие да се разбурите“
✦ „Моето дете не умре, беше убиено од систем кој не штити, туку убива“
✦ „62 животи – 62 иднини, 62 семејства со вечна болка“
✦ „Правда и одговорност – нема мир без тоа“
Во исто време, Министерството за внатрешни работи постави контроли на влезовите во Кочани и не им дозволуваше на граѓаните од други градови да влезат во градот за да учествуваат на „Маршот за ангелите“.
Со ваквата постапка, како што реагираа дел од учесниците и организаторите, се нарушува уставно загарантираното право на слободно движење и правото на мирен протест, кои се темелни демократски вредности гарантирани со Уставот.
Според присутните, ограничувањето предизвика револт кај граѓаните, а настанот во Кочани се одвиваше под засилено полициско присуство.
