18 илјади вработени во основните училишта без јануарска плата, законските рокови поминати!
Речиси 18.000 вработени во основното образование сè уште ја чекаат јануарската плата, иако законските рокови за исплата се веќе поминати. Ова доцнење предизвика бран незадоволство меѓу просветните работници, кои преку социјалните мрежи бараат одговори за празната државна каса.
Од Самостојниот синдикат за образование, наука и култура (СОНК) го потврдија доцнењето, но смируваат дека станува збор за технички проблем. Според нивните информации, ресорното Министерство за образование и наука (МОН) навреме ги доставило пресметките до трезорот.
„Списоците се благовремено доставени, но од објективни причини во Министерството за финансии се доцни. Не уверуваат дека денес платата конечно ќе биде исплатена“, соопштија од СОНК преку нивната официјална Фејсбук страница.
Иако од синдикатот велат дека причините се оправдани, наставниците на социјалните мрежи реагираат дека сметките и кредитите не чекаат „објективни причини“. Ова не е првпат просветните работници да се соочуваат со неизвесност за своите лични доходи, што дополнително го револтира наставниот кадар во ек на зголемени животни трошоци.
