170 илјади работници живеат со плата под 500 евра – ССМ бара итно покачување
Сојузот на синдикати на Македонија алармира дека повеќе од две третини од вработените во земјава сè уште примаат плата под државниот просек, што според нив е јасен сигнал за длабока социјална криза. Според последните податоци на ССМ, дури 170 илјади граѓани месечно располагаат со помалку од 30.000 денари, што е далеку под прагот потребен за достоинствен живот.
„Наместо да се изнајдат системски решенија, сведоци сме на постојано одложување и префрлање на одговорноста меѓу Владата, Парламентот и бизнис-заедницата. Во меѓувреме, семејствата едвај врзуваат крај со крај, а реалноста е дека со две минимални плати не може да се покријат ни основните месечни потреби,“ велат од ССМ.
Синдикатот бара итно покачување на минималната плата на најмалку 500 евра, а сите останати плати да пораснат за дополнителни 6.000 денари, со цел да се ублажи ударот од растечките трошоци на животот. Последните пресметки на ССМ покажуваат дека синдикалната минимална кошница веќе ја надминала вредноста од 65 илјади денари, што значи дека трошоците за храна, сметки и други основни потреби постојано растат.
Од Владата, пак, и натаму остануваат на ставот дека темата треба да се решава во рамките на Економско-социјалниот совет, со нагласување дека само преку дијалог и компромис може да се дојде до прифатливо решение.
