14-годишно момче отвори оган во трговски центар во Бангкок, најмалку двајца се мртви
Полицијата во Тајланд уапсила 14-годишно момче откако отворило оган во луксузен трговски центар во Бангкок, објавија светските медиуми. Најмалку две лица загинаа, а пет други се повредени.
Видеата покажуваат шокирани толпи луѓе кои трчаат низ излезите на трговскиот центар Siam Paragon во центарот на градот.
Според локалните медиуми, уапсениот има психички проблеми. Тој беше приведен во рок од еден час по пукањето и однесен во блиската болница на преглед и испрашување од полицијата.
Локалните власти не соопштија од каде малолетниот стрелец го добил оружјето. Сопственоста на огнено оружје во Тајланд е значително повисока отколку во другите азиски земји.
Според податоците од 2017 година, повеќе од 10,3 милиони цивили во Тајланд поседуваат пиштоли, што е еднакво на околу 15 на секои 100 луѓе. Сепак, масовните престрелки во земјата се ретки.