100 млади каратисти преживеале хорор патување до Балканското првенство: Родителите гневни!
Во организација на Карате федерацијата на Македонија, во средата биле испратени два автобуси со околу 100 млади каратисти на меѓународен турнир во Црна Гора – Балканското првенство во карате. Наместо спортски дух и натпреварувачка атмосфера, децата доживеале стресно и ризично патување, тврдат нивните родители.
Според нив, секој родител платил по околу 210 евра (околу 12.600 денари) за учеството на своето дете, очекувајќи организација на ниво. Наместо тоа добиле, како што тврдат, дефектни автобуси, нечовечки услови за сместување и заглавување среде пат во Албанија.
Автобусите требало да тргнат од Скопје околу пладне во средата, но два автобуси испратени од превозникот биле во лоша техничка состојба и не тргнале воопшто. По двочасовно доцнење, сепак биле доведени други автобуси кои конечно тргнале кон Црна Гора каде пак ги дочекало ново непријатно изненадување.
Хотелот во кој биле сместени младите каратисти, според родителите, бил во катастрофална состојба – полн со бубачки, мувла, а храната била толку лоша што речиси никој од децата не јадел.
Вистинскиот кошмар започнал на враќање од турнирот. Еден од автобусите се расипал среде пат во Албанија, оставајќи ги децата и возрасните патници заглавени со часови. Дополнителна грижа на родителите било тоа што многу од децата останале без батерија на телефоните, и комуникацијата се изгубила.
Родителите се револтирани и прашуваат како е возможно по толку трагедии и предупредувања за безбедноста во јавниот превоз, повторно да се испраќаат деца со неисправни автобуси. Тие бараат одговорност од Карате федерацијата, надлежните инспекторати и институциите, и јавно прашуваат:
„Каква е оваа држава која дозволува нејзината иднина да патува во вакви услови? Дали треба да се случи нова трагедија за да се преземат мерки?“.
