10 полицајци влегле во Пулс минути пред пожарот, должни биле да ја прекинат забавата и спречат пиротехниката, рече обвинителката Трајчева

Обвинителството за гонење на организиран криминал и корупција денеска со Судот поднесе три обвиненија. На брифинг со новинарките обвинителката Ивана Алексова Трајчева рече дека минути пред пожарот во објектот влегле 10 обвинители, од кои еден сега е починат.

„Пракса е штом полицијата влезе во објектот, веднаш да се вклучат светлата и да се гаси музиката. Иако тоа не е стриктно по правилник, тоа е воспоставена пракса на работа за да се смири ситуацијата. Тие требало да ја исклучат пиротехниката кога влегле, но не го сториле тоа,“ појаснија од обвинителството.

Оваа четврта кривична пријава, поднесена во јуни, сега е процесуирана во обвинителен акт.

Второто обвинение опфаќа 9 полициски службеници (првично биле 10, но еден од осомничените, Владо Петров, во меѓувреме починал). Тие се гонат за периодот 2022 и 2023 година за издавање согласности за исполнетост на услови.

Клучен проблем бил паркингот. Според законот и квадратурата, дискотеката морала да има најмалку 20 сопствени паркинг места. „Не може да се прифати туѓ паркинг или јавна површина. Тие морале да бидат во сопственост на објектот. Но, по барање на сопственикот, полицајците потпишале дека условите се исполнети,“ велат од ОЈОГОКК.

Во периодот 2024-2025 година клубот немал активна лиценца, а една година работел со фалсификуван документ. Овие службеници немале надлежност за внатрешни контроли, туку само за надворешните услови (паркинг и ред).

Третото обвинение се однесува на тројца полицајци (еден од нив се појавува и во претходното обвинение) за злоупотреба на службената положба. Во текот на 2022, 2023 и 2024 година, при констатирање на прекршоци – како присуство на малолетници – тие во записниците наведувале „неактивно правно лице“ или погрешни податоци. Со ова, прекршочните постапки пропаѓале, а сопствениците и правното лице избегнувале плаќање казни.

Истрагата била маратонска и опфатила период од една деценија.

За дел од полицајците кои постапувале во периодот од 2012, 2018 и 2019 година, истрагата е запрена бидејќи или настапила застареност или немало елементи за кривично дело. За тројца службеници предметот е отстапен на ОЈО Кочани бидејќи станува збор за полесни дела.