1 милион луѓе и само еден автопат: Палестинците бегаат по израелското предупредување

Евакуацијата започна – стотици илјади палестински цивили бегаат во јужниот дел на Појасот Газа по предупредувањето на Израел за евакуација, пишуваат светските агенции.

Областа за која е наредена евакуација е една третина од целата територија на Газа. Предупредувањата го вклучуваат градот Газа, како и два големи бегалски кампа, Џабалија и Кампот на плажа. Ги вклучува и градовите Беит Ханун и Беит Лахија, кои се наоѓаат во близина на контролниот пункт Ерез во северниот дел на појасот. Тој е еден од најгусто населените делови на Појасот Газа.

Во оваа област живеат најмалку 1,1 милион луѓе. Населението на градот Газа е околу 600.000 луѓе, околу 90.000 луѓе живеат во кампот на плажата, а 116.000 луѓе живеат во Џабалија.

Во областа има и најмалку шест болници, како и над 20 клиники за итни случаи.

Секое движење на големи групи луѓе е крајно опасно и може да предизвика паника. Постои единствен автопат кој минува од север кон југ низ Појасот Газа. Резервите на гориво се исто така ниски.

Друг предизвик е што не е јасно дали Израел ќе престане да ја бомбардира областа за да започне со евакуација на цивили.

Огромен дел од луѓето кои се евакуирани се деца, бидејќи речиси половина од населението на Појасот Газа е под 18 години.