ЗК Пелагонија му ја блокираше сметката на ЈП Стрежево
ЗК Пелагонија, најголемиот производител на жито и храна во Македонија, соопшти дека нема повеќе да дозволи да трпи штети, како што велат од таму, поради неспособноста на менаџментот на ЈП Стрежево, со информација дека е блокирана сметката на ова јавно претпријатие за наводнување.
„ЈП Стрежево со години нанесува материјални штети на ЗК Пелагонија. Одлуката да ја блокираме сметката е единствено во насока да го заштитиме нашиот комбинат после долги години толерирање на неспособноста на раководството на ЈП Стрежево.
Штетите врз комбинатот се нанесени од повеќе аспекти на работењето на ЈП Стрежево, непрофесионалноста и некомпетентноста на раководството. Секоја година се соочуваме со нефункционирање на цели канали за наводнување, немање доволен притисок на вода за работа на системите за наводнување и постојани дефекти во тек на сезона на наводнување. Со истите проблеми комбинатот се соочува и оваа година и повторно трпиме големи штети. Насадите на ЗК Пелагонија повеќе денови и недели се оставени без капка вода во најкритичните периоди за пченката иако во езерото има доволно вода, но ЈП Стрежево не е способно истата да ја испорача“, тврдат од земјоделскиот комбинат.
Од друштвото велат дека станува збор за судски спор од еден милион евра претрпена штета од 2015 која ЈП Стрежево не ја признава.
„ЗК Пелагонија по добивањето на пресудата од страна на Апелационен суд Битола ТСЖ-262/21 од 11.01.2022 година, не ја блокира сметката на Стрежево и побара спогодбено да се плаќа на рати со цел да не се прават нови жалби и да не продолжува спорот. И, покрај покажаната добрата волја, ЈП Стрежево го оспорува одлучувањето на судот и повторно се потврдува првичната одлука, со нова пресуда донесена од Апелационен суд Битола под број ТСЖ-85/23 од 14.06.2023 година.
И покрај потврдата на одлуката во корист на Комбинатот, не беше активирано извршување, туку повторно беше понудено плаќање на рати, согласно можностите на Стрежево и потребите на ЗК Пелагонија.
ЈП Стрежево не го испочитува ниту овој договор, а ЗК Пелагонија се доведува во неповолна финансиска позиција во период кога е есенската сеидба, кога средствата за нејзина реализација се крајно неопходни и кое било задоцнување во набавките се одразува на квалитетот на идното производство следната година.
Потенцираме дека поради ваквото непрофесионално и неодговорно работење ние и оваа година 2023 повторно трпиме големи штети“, информиараат од ЗК Пелагонија.
