„ЖЕЉКО МИТРОВИЌ Е ПОМОЌЕН ОД ВУЧИЌ“ – Алексиќ после жестоката расправа со „напредњаците“ во Собранието
Потпретседателот и шеф на пратеничката група на Народната партија во српското Собрание, Мирослав Алексиќ, во емисијата „Разбуди се“ изјави дека му делува дека сопственикот на ТВ Пинк Жељко Митровиќ е помоќен од Александар Вучиќ, со оглед на тоа што ја игнорирал најавата на претседателот на Србија дека ќе го укине реалното шоу „Задруга“. Тој се запраша како е можно личност како Ана Брнабиќ да биде премиер, наведувајќи дека на вчерашното излагање во Собранието, премиерката покажала дека е нечесна и бескрупулозна, како и дека не ги почитува граѓаните на Србија.
Алексиќ рече дека владата очигледно не одговара на барањата на граѓаните кои веќе 6-та недела се на улица и затоа е неопходно да се премине на друг облик на протест.
„Ќе мораме да одиме чекор понатаму и да направиме некои големи акции. Србија ќе мора да запре. Ако насилството не престане, Србија ќе мора да престане. Што е поважно од безбедноста на граѓаните? Бизнис, туризам? Ништо не е поважно од тоа. Со оглед на тоа што власта сето тоа го игнорира и ги доведува луѓето во ситуација да мора на некој начин да го радикализираат протестот, тоа е на нив“, нагласува Алексиќ.
„Вчера премиерката со часови зборуваше во Собранието. Таа во своите говори покажа дека нема ниту свест ниту совест кога се во прашање трагедиите, барањата на граѓаните и како треба да реагира на тоа. Таа вчера не сакаше ништо да прифати како дискусија, спиновите, манипулациите, префрлањето на одговорноста на други продолжуваат. Зачуден сум што луѓето можат да бидат толку нечесни и на ваков начин да комуницираат со граѓаните на Србија. Шест недели имате десетици луѓе низ земјава кои протестираат, кои бараат нешто нормално… Се однесуваат како ништо да не се случува“, опишува Алексиќ.
Потпретседателот на Народната партија рече дека целта на протестот „Србија против насилството“ е луѓето да сфатат дека постои институционална одговорност на оние кои управуваат со земјата.
Алексиќ рече дека добил впечаток дека сопственикот на ТВ Пинк, Жељко Митровиќ е помоќен од претседателот на Србија, Александар Вучиќ.
„Самиот претседател најави дека реалното шоу ќе биде откажано, а Митровиќ рече дека нема и дека продолжува да ја работи својата работа. Има и барање за отпуштање на луѓе од РЕМ, но тие се прават мртви и злоупотребуваат се затоа што овие медиуми (како Пинк, уред.) се нивните упоришта и главниот лост на власта. Тие не се подготвени да се откажат ниту од милиметар од моќта, бидејќи за нив моќта е слобода. Се додека имаат моќ – слободни се, и имаат моќ додека имаат фабрики на лаги. Иако имате 18 мртви млади луѓе, не е доволно тие да се разбудат и да прашаат „Каде оди ова“? Наместо тоа, тие се насочени кон актери, професори, лекари. Секој што ќе го крене гласот и ќе каже нешто против режимот или ќе ги поддржи протестите е мета на режимските медиуми и на нивните чела се исцртуваат цели и секако се случуваат трагедии“, рече Алексиќ.
Извор: Нова.рс
Фото: Фејсбук
