ЗГОЛЕМЕНА ПОТРОШУВАЧКА НА СТРУЈА ВО ЕВРОПА: Мегаватсат поскапува за 50 отсто на европските берзи
Студениот бран ја зголеми потрошувачката и цените на струјата во Европа, па во споредба со декември цената на мегават-час на европските берзи порасна за 50 отсто и сега достигнува 120 евра, јавува денеска РТС.
Поради студот цела Европа бележи пораст на побарувачката, а реагираат и берзите за струја.
Големопродажната цена на мегават-час во декември беше меѓу 70 и 80 евра, а сега достигнува 120 евра, па овие денови најмногу увезуваат Германија, Италија и Унгарија.
„Времето е некако највидливиот фактор кој влијае на зголемување на потрошувачката, побарувачката и со тоа и на поскапување во рок од два-три дена. Потоа има многу други фактори – капацитет за складирање на гас, потоа имаме и некои макроекономски и глобални политички фактори. Така што не можеме со сигурност да кажеме, но ако продолжи овој студен бран, можеме да очекуваме сличен тренд на цените да продолжи до крајот на јануари“, изјави за РТС Милош Младеновиќ, извршен директор на српската берза за електрична енергија СЕПЕКС.
Во Србија снабдувањето е стабилно, а само од средата потрошувачката на струја е зголемена за една петтина.
„Производството е стабилно. Во првите 10 дена од јануари е извезена и продадена струја во вредност од 78.000 мегават-часови, при што е остварен приход од околу 6,7 милиони евра“, изјави за РТС Давид Жарковиќ, извршен директор за енергетско портфолио во ЕПС.
