ЗЕМЈОДЕЛСКИТЕ ПРОТЕСТИ СЕ ПОБЛИЗУ ДО НАС: Се кренаа и бугарските земјоделци
Стотици бугарски земјоделци денеска протестираа во Софија бидејќи, како што наведоа, Владата не презема ништо за да ги реши нивните се поголеми проблеми, а протестите ќе продолжат и утре.
Демонстрантите го повикаа бугарскиот министер за земјоделство Кирил Ватев да поднесе оставка поради неисполнување на ветувањата за олеснување на административниот товар на земјоделците, како и неможноста на државата да ги олесни нивните високи трошоци и падот на приходите.
Според извештаите, бугарските земјоделци, како и нивните колеги во другите делови на Европа, се фрустрирани од сегашните регулативи на Европската унија, тешкотиите што произлегуваат од зголемувањето на трошоците за набавка на ѓубрива и цените на енергијата поради војната во Украина, како и се поголемиот увоз на неконкурентни земјоделски производи кои ги намалуваат цените на домашните производи.
Венцислав Варбанов, кој претседава со Асоцијацијата на земјоделски производители, рече дека „владата додава уште непотребни товари, наместо да бара некакво олеснување за земјоделците“.
– Нашите интереси не беа заштитени дури и кога не преплави евтина украинска стока, а немаме ни буџетски гаранции за загубите што ги претрпевме поради војната во таа земја, рече тој.
Во меѓувреме, Националната асоцијација на производители на жито (НАЗ), која обединува голем број производители на жито во Бугарија, најави протестни акции за утре со почеток во 10 часот со неограничено времетраење, пренесе БТА.
Таа одлука членовите на тоа здружение ја донеле по денешната седница во Владата, бидејќи подрачните ограноци на НАЗ едногласно оцениле дека предлогот на државата е незадоволителен и неприфатлив.
По повод изјавата на бугарскиот премиер Николај Денков дека се предвидува финансиска поддршка да добијат само производителите на жито кои можат да докажат загуба за 2023 година, здружението потенцираше дека бара некаков вид обесштетување за сите производители на жито.
