Заврши постапката за налепници „NMK“, набавно чинат 637,2 денари

Завршена е постапката за набавка на налепници со новата ознака „НМК“, а добитник на тендерот е компанијата КВАНТУМ од Скопје заедно со германската „ЕХА Хофман интернационал“.

За оваа цел, МВР ќе потроши 141,6 милиони денари (односно 2,29 милиони евра) во период од три години колку што предвидува договорот за набавката.

Според договорот објавен на страницата на електронскиот систем за јавни набавки, единечната цена на пар таблички е 540 денари плус 97,2 денари ДДВ, што вкупно е 637,2 денари.

Налепниците, зависно од големината се од 29,5 до 41 денари. Како што е наведено во рамковната спогодба со „Квантум“, налепниците со димензии 99×42 милиметри и со 63х37 милиметри чинат 35,4 денари; оние со 85х40 милиметри – 41,3 денари; а најмалите 48×18 милиметри се и најевтини – 29,5 денари. Овие цени се предвидени за две налепници.

Се уште не е познато која цена ќе важи за сопствениците на возилата.

Првата испорака треба да почне 30 дена од потпишувањето на договорот, а набавката ќе се реализира според потребите кои ќе ги утврди МВР.

Обврската за користење на кодот НМК на регистарските таблички е од Преспанскиот договор, согласно кој рокот за замена е до февруари 2024 година.

Наместо целосна замена на регистарските ознаки, со новата владина одлука, граѓаните ќе треба да добијат само лепенка со новиот код.