„ЗАТИШЈЕ ПРЕД БУРА“ НА ГРАНИЦА: Евзони денес „дише“ слободно, Меџитлија блокиран за камиони – најавена целосна блокада за четврток

Граѓаните кои денеска и утре планираат патување кон Грција можат да здивнат, барем кога станува збор за граничниот премин „Евзони“ (Богородица). Поради големиот христијански празник Водици (Богојавление), грчките земјоделци одлучија привремено да ги повлечат блокадите.

Според најавите, сообраќајот на овој фреквентен премин ќе се одвива непречено во следните 48 часа, пракса која земјоделците ја применија и за време на Божиќ и Нова година.

Сепак, ситуацијата е поинаква на вториот граничен премин. Од АМСМ информираат дека на преминот „Ники“ (Меџитлија), од 09:00 часот утринава во прекин е сообраќајот за товарни возила.

Ова „празнично примирје“ ќе трае кратко. Претставниците на земјоделците од цела Грција на состанок одлучија да ги радикализираат протестите. Најавена е 48-часовна блокада која ќе започне во четврток и ќе трае и во петок. Планот е да се блокира целата национална патна мрежа, клучните патни правци и граничните премини.

Земјоделците од Евзони потврдија дека ќе се приклучат кон генералниот штрајк, но деталите ќе се знаат утре. За в среда е закажан клучен состанок на кој ќе се одлучи:

Сè ќе зависи од утрешното утро. Владиниот портпарол Павлос Маринакис најави дека утре (среда) Владата ќе ги соопшти и прецизира мерките за помош на земјоделците. Доколку понудените мерки бидат прифатливи, можно е протестите да запрат. Во спротивно, Грција од четврток влегува во сообраќајна парализа.