ЗАСТАНА КОНТРА ИЛОН МАСК КОЈ БАРА ПАУЗА ЗА ВЕШТАЧКАТА ИНТЕЛИГЕНЦИЈА – Бил Гејтс се чуди: Не разбирам кој би можел да го запре напредокот
Ко-основачот на Мајкрософт и филантроп, Бил Гејтс, рече дека паузата во развојот на вештачката интелигенција (ВИ), што ја бара шефот на Твитер, Илон Маск и повеќе од 1.000 експерти, не е решение за предизвиците што ги носи оваа технологија.
Гејтс во интервју за Ројтерс рече дека не е јасно како ќе функционира паузата во развојот на вештачката интелигенција на глобално ниво и сугерираше дека потенцијалот на вештачката интелигенција треба да се искористи на најдобар можен начин.
– Вештачката интелигенција носи огромни придобивки, тоа е јасно, и ние треба да ги идентификуваме областите на развој на вештачка интелигенција кои би можеле да бидат проблематични. Не разбирам кој би можел да го запре развојот на вештачката интелигенција. Дали секоја земја би се согласила на ваква пауза?, рече Гејтс и додаде дека има многу различни мислења на оваа тема.
Агенцијата соопшти дека тоа е првиот јавен коментар на Бил Гејтс за отвореното писмо на Илон Маск и група експерти и директори за вештачка интелигенција во индустријата, кои повикаа на најмалку шестмесечна пауза во развојот на вештачката интелигенција.
Потписниците на отвореното писмо, објавено од непрофитниот институт „Иднина на животот“, бараат мораториум на развојот на вештачката интелигенција додека не се постигнат заеднички безбедносни протоколи за такви достигнувања, пренесе британската агенција.
– Моќните системи за вештачка интелигенција треба да се развиваат само кога ќе бидеме убедени дека нивните ефекти ќе бидат позитивни и кога ќе можеме да управуваме со ризиците што ги содржат, се наведува во писмото, пренесува Ројтерс.
(Ројтерс/Танјуг)
