ЗАРАДИ ОВАА НАЈАВА НА ТРАМП, ЕВРОПА ТРЕПЕРИ: Дали светот го чека нова трговска војна?
За време на неговата кампања, Доналд Трамп вети дека ќе воведе даноци за сите стоки увезени во САД, доколку ја врати Белата куќа. По неговата победа, компаниите и економистите ширум светот се обидуваат да проценат колку сериозно треба да се сфати ова ветување.
Во минатото, Трамп таргетираше тарифи за одредени земји, како што е Кина, или за одредени индустрии, како што е челикот. Сепак, новото предизборно ветување за воведување данок од 10% до 20% за сите странски производи би можело значително да влијае на цените ширум светот.
„Европејците ќе мора да платат висока цена“
Минатиот месец Трамп конкретно ја спомена Европа. „Европската унија звучи толку убаво, толку одлично, нели? Сите тие мали европски земји што се здружуваат… Не ги увезуваат нашите коли. Не ги купуваат нашите земјоделски производи“, рече тој.
„Тие продаваат милиони и милиони автомобили во САД. Не, не, не, ќе мора да платат висока цена“.
По потврдувањето на победата на Трамп, акциите на компаниите како БМВ, Мерцедес и Фолксваген паднаа меѓу 5 и 7 отсто, со оглед на тоа што САД се најголемиот извозен пазар за германските производители на автомобили.
За време на кампањата, Трамп тврдеше дека тарифите се решение за низа проблеми, вклучително и сузбивање на Кина и спречување на илегалната миграција.
„Целта не е да се започне трговска војна“
„Тарифата е најубавиот збор во речникот“, изјави Трамп, укажувајќи дека тоа е оружје што очигледно планирал да го користи. Иако голем дел од оваа реторика е насочена кон Кина, јасно е дека не застанува тука.
Некои сојузи, како што е ЕУ, веќе подготвуваат превентивни мерки против САД, бидејќи не ги сфатија сериозно заканите на Трамп со царини, кои сепак беа воведени подоцна.
Минатата недела министрите за финансии на Г7 изјавија дека ќе се обидат да ја потсетат Америка под водство на Трамп за важноста на сојузите во светската економија, бидејќи „целта не е да се започне трговска војна“.
Во минатото, ЕУ воведе царини за одредени американски производи, како што се мотоциклите Харли-Дејвидсон, бурбон вискито и фармерките Левис, како одговор на американските царини за челик и алуминиум.
Висок банкар од еврозоната изјави за Би-Би-Си дека американските царини „не се инфлаторни во Европа, но се зависи од тоа како Европа ќе реагира“.
Минатиот месец ММФ предупреди дека големата трговска војна би можела да ја намали светската економија за 7%, колку што е заедно француската и германската економија.
Обединетото Кралство, по Брегзит, се соочува со прашањето каква позиција да заземе во овој потенцијален, ако не и неизбежен, трансатлантски трговски конфликт. Сегашната насока на ОК е да се приближи до ЕУ, вклучително и во однос на стандардите за храна и земјоделство, што би го отежнало постигнувањето близок трговски договор со САД.
Поранешниот главен трговски преговарач на Трамп, Боб Лајтхајзер, изјави за Би-Би-Си дека фактот што Британија останува блиску до ЕУ го спречил да постигне договор со неа. „Тие ви се многу поважен трговски партнер од нас“, рече тој.
ОК може да се обиде да остане неутрална, но тешко ќе ги избегне трговските последици, особено во фармацевтскиот и автомобилскиот сектор.
Така започнуваат сериозни трговски војни
Дипломатите се надеваат дека прагматичните економски советници на новоизбраниот претседател ќе препорачаат подобар третман за сојузниците. Исто така, многумина се прашуваат дали светот би имал поголема корист доколку ОК се врати во ЕУ за да помогне да се спречат нови трговски тарифи.
Ако најголемата светска економија се сврти кон протекционизам во големи размери, ќе биде тешко да се убедат другите помали економии да не го следат истиот пат.
Сето ова сè уште останува неизвесно. Предупредувањата на Трамп треба да се сфатат сериозно, но ништо не е сосема сигурно. Сепак, вака почнуваат сериозни трговски војни, заклучува Би-Би-Си.
