Започна исплатата на МојДДВ
Граѓаните во наредните денови ќе почнат да ги добиваат средствата од повратот на дел од ДДВ за првото тримесечје од 2026 година, откако Управата за јавни приходи (УЈП) официјално ја започна исплатата.
Од УЈП информираат дека процесот на исплата се одвива етапно, при што средствата се префрлаат постепено, веднаш по обработката на налозите за исплата, па граѓаните може да очекуваат различно време на пристигнување на парите на нивните сметки.
Според официјалните податоци, овој квартал поврат на ДДВ ќе добијат вкупно 528.447 корисници, а за таа намена се исплаќаат околу 836 милиони денари.
Сепак, кај дел од граѓаните исплатата засега е стопирана. Од УЈП појаснуваат дека кај 4.968 корисници се утврдени неточни податоци за трансакциските сметки, поради што средствата нема да бидат префрлени сè додека податоците не се коригираат.
Дополнително, кај 7.560 корисници износот за поврат е помал од 50 денари, поради што тие средства ќе бидат префрлени во следниот квартал.
Од Управата апелираат граѓаните кои сè уште не добиле исплата, а очекуваат поврат на ДДВ, задолжително да ги проверат и ажурираат податоците за трансакциската сметка преку апликацијата „МојДДВ“.
Надлежните посочуваат дека со точни и ажурирани податоци, исплатата ќе се реализира без одложувања во следниот циклус.
