АПИС: Предлог-законот за игри на среќа ќе предизвика затворање на легални објекти
Асоцијацијата на приредувачи на игри на среќа (АПИС) реагира на новиот Предлог-закон за игри на среќа, оценувајќи дека дел од предложените одредби се прифатливи, но дека воведувањето на дистанца од 500 метри меѓу објектите и образовните институции ќе има сериозни последици врз легалниот сектор.
Од АПИС потенцираат дека заштитата на младите од зависност од игри на среќа останува нивен приоритет, но сметаат дека предложената регулатива во делот на локациското ограничување е дискриминаторска и уставно спорна, повикувајќи се на слободата на пазарот и претприемништвото.
Според нив, ваквото решение не е фиксна и предвидлива регулаторна рамка и може да создаде проблеми при спроведување, со оглед дека урбаните услови се менуваат со текот на времето. Како пример наведуваат дека растојание од 500 метри денес може да има сосема поинакво значење во иднина.
Асоцијацијата предупредува и дека примената на ваквата дистанца би можела да доведе до затворање на голем број легални објекти за игри на среќа. Тие се повикуваат на изјави на локални претставници, според кои во одредени општини, поради близината на училишта, речиси и да не би останале вакви објекти.
Од АПИС додаваат дека дополнителен проблем претставува фактот што државата задржува право да организира онлајн игри на среќа, што според нив ја доведува во прашање ефективноста на мерката за физичка дистанца и заштитата на младите.
Тие предупредуваат дека ограничувањата може да доведат до појава на нелегални објекти и „сив пазар“, како и до значителни буџетски загуби и губење на работни места во индустријата.
АПИС упати апел до Собранието да отвори јавна расправа и да ја вклучи стручната јавност пред донесување на законот, оценувајќи дека без поширока консултација би можеле да настанат сериозни економски и правни последици.
