Започна државната матура – прв предизвик за над 15.000 матуранти
Денеска, повеќе од 15.000 ученици од цела земја го започнуваат последниот дел од своето средношколско образование – државната матура. Прв на ред е задолжителниот екстерен испит по мајчин јазик и литература.
Најмногу матуранти полагаат на македонски јазик – 9.969 ученици, по што следуваат 4.339 на албански, 292 на турски и 10 на српски јазик. Испитите се спроведуваат во училишта кои ги исполнуваат условите според правилникот, а за останатите се обезбедени простории во факултети.
Вкупно 15.004 ученици се пријавиле за матурата – најмногу од стручните училишта (8.816), потоа од гимназиите (5.966), и 222 од уметничките училишта.
На 11 јуни следува изборниот екстерен предмет. Како и секоја година, најмногу ученици ќе полагаат англиски јазик (13.457). Покрај него, учениците избрале и математика, естетика, германски, француски, руски, италијански јазик и филозофија.
Процесот го следат околу 2.000 тестатори, а матурантите имаат на располагање пример-тестови на веб-страницата на ДИЦ, за подобра подготовка.
Оние што нема да ја положат матурата во јуни, ќе имаат втора шанса во августовската сесија.
